Егор Борисов: «Өрөспүүбүлэкэҕэ бары тыллары сайыннарыы политиката тутуһуллар»

Олунньу 13 күнүгэр Саха Өрөспүүбүлүкэтин Президенэ Егор Борисов Төрөөбүт тыл уонна сурук-бичик күнүгэр, итиэннэ сахалартан бастакы тыл үөрэхтээх учуонай, уhулуччулаах сырдатааччы, саха маассабай суругун-бичигин төрүттээччи, сахалыы тылынан бастакы үөрэх кинигэлэрин суруйбут Семен Андреевич Новгородов төрөөбүтэ 120 сылыгар анаммыт үөрүүлээх түмсүүгэ кытынна.

 Мунньах чэрчитинэн Саха Өрөспүүбүлүкэтигэр олунньу 13-23 күннэригэр Төрөөбүт тыл декадата биллэрилиннэ, бу тэрээһиҥҥэ Саха сиригэр олохтоох 124 норуот бэрэстэбиитэлэ кыттыаҕа.
Саха Өрөспүүбүлүкэтин Президенэ Егор Борисов дакылаатыгар оскуолаҕа төрөөбүт тыл уонна литература предметтэригэр государственнай аттестацияны ыытыы өрөгүйүөннээҕи былаас уорганнарын болномуочуйаларыгар бэриллибитин, үөрэх сүрүн программатын оҥорууга уонна бигэргэтиигэ өрөгүйүөн национальнай уонна этнокультурнай уратылара булгуччу учуоттанарын уонна билиҥҥитэ үөрэх литературатын таһаарыы боппуруоһа быһаарылла илигин, бу хайысхаҕа үлэ салгыы ыытылларын иһитиннэрдэ.  Саха сирин аҕа баһылыга «Саха Өрөспүүбүлүкэтигэр тыллар туһунан» сокуону олоххо киллэриигэ баар көтүтүүлэргэ, туһааннааҕынан дьыаланы-куолуну саха тылынан ыытыы ситэри киирэ илигэр, тутатына тылбаастыыр специалистар тиийбэттэригэр тохтоото, маны сэргэ почтаҕа телеграммалар, суруктар уонна реклама, биллэрии, этикетка, прейскурант, таска ыйанар аат уонна да атын нууччалыы эрэ тылынан суруллалларын ыйда. Егор Борисов Саха Өрөспүүбүлүкэтигэр бары тыллары сайыннарыы политиката тутуһулларын бэлиэтээтэ.
«Бу хайысхаҕа үгүс үлэ ыытыллар, ол гынан баран өссө элбэх оҥоһуллуохтаах», – диэн түмүктээтэ кини.
Өрөспүүбүлүкэ Президенэ Хотугу аҕыйах ахсааннаах норуоттар уустуктарын уонна гуманитарнай чинчийиигэ институт Тыл политикатыгар киинин үрдүкү научнай үлэһитигэр Михаил Алексеевка, М.К. Аммосов аатын сүгэр Хотугу-илиҥҥи федеральнай университет (ХИФУ) нуучча тылыгар кафедратын профессорыгар, Саха Өрөспүүбүлүкэтин духуобунаска Академиятын академигар Николай Самсоновка уонна суруйааччы, радиожурналист, НВК «Геван» программатын ыытааччытыгар Николай Куриловка төрөөбүт тылы харыстааһыҥҥа уонна сайыннарыыга үтүөлэрин иһин государственнай наҕараадалары туттарда.
Саха Өрөспүүбүлүкэтин Президенин салалтатынан үлэлиир Тыл политикатыгар сэбиэт бэрэссэдээтэлэ, СР Бырабыыталыстыбатын Бэрэссэдээтэлин солбуйааччыта Феодосия Габышева Төрөөбүт тыл уонна сурук-бичик күнэ Саха сиригэр 16-с төгүлүн ыытылларын бэлиэтээтэ уонна сыллата бэриллэр анал наҕараадалары туттарда. 
Ыалдьыттартан үөрүүлээх түмсүүгэ эҕэрдэ тылы Россия наукаҕа Академиятын этнологияҕа уонна антропологияҕа институтун научнай үлэҕэ директорын солбуйааччы, европейскай уонна американскай чинчийии Киинин салайааччыта, историческай наука доктора, РФ наукатын үтүөлээх үлэһитэ Марина Мартынова уонна Калмыкия государственнай университетын педагогикаҕа кафедратын салайааччыта, педагогическай наука доктора Аркадий Панькин эттилэр.    
Бу киэһэни салгыы бэртээхэй концерт киэргэттэ.