| командировка |
 |
| 17 Февраля 2012 года, 15:46 |
|
Егор Борисов: «Өрөспүүбүлүкэ Бырабыыталыстыбата уонна «АЛРОСА» компания оройуон сайдыытыгар көхтөөхтүк кыттыахтара» Күн иккис аҥарыгар өрөспүүбүлүкэ государственнай былааһын уорганнарын отчуотун чэрчитинэн Егор Борисов «Кимберлит» спорт дыбарыаһыгар Мирнэй оройуонун нэһилиэнньэтин кытта көрүстэ. Манна оройуон баһылыга Ильдар Султанов, Мирнэй куорат баһылыга Сергей Александров уонна «АЛРОСА» АК бастакы вице-президенэ, толорооччу директора Игорь Соболев, тэрилтэлэр, олохтоох тэриллиилэр, общественнай тэрилтэлэр уонна үөрэх кыһаларын бэрэстэбиитэллэрэ кытыннылар. Көрсүһүү аһаҕас кэпсэтии: ыйытыы – эппиэт халыыбынан ыытылынна уонна «Алмазный край» телерадиокомпания ханаалынан оройуоҥҥа быһа биэриинэн көрдөрүлүннэ. Өрөспүүбүлүкэ Президенигэр телефонунан, интернет-почтанан, суругунан уонна сааалаттан 134 ыйытыыны биэрдилэр, олортон 25 боппуруос тута көрүлүннэ. Хаалбыт ыйытыыларга хоруй быраабыла быһыытынан биир ый иһигэр булгуччу бэриллиэҕэ. Егор Борисов киирии тылыгар аһаҕас уонна кырдьыктаах кэпсэтиини ордорорун бэлиэтээтэ уонна өрөспүүбүлүкэ араас таһымын, Бырабыыталыстыбатын, министиэристибэлэрин, биэдэмэстибэлэрин, улуустарын, тэрилтэлэрин салайааччылара норуоту кытта атах тэпсэн олорон сэһэргэһэллэрин ирдиирин эттэ. «Маннык кэпсэтиилэргэ дьиҥи, кырдьыгы булаҕын уонна сүрүнэ – норуот иннигэр улахан эппиэтинэһи сүгэргин өйдүүгүн. Бу курдук кэпсэтиилэр түмүктэригэр дьон-сэргэ былаас уорганнарыгар итэҕэйэр буолуоҕа, салайааччылар эрэ буолбакка, общество эмиэ эппиэтинэһин үрдэтиэҕэ. Мин тыа сирин үлэһит ыалыгар улааппыт киһибин. Аҕыс оҕоттон улаханнарабын. Биһигини ийэбит ииппитэ. Олох уустуктарын эппинэн-хааммынан билэн улааппытым. Үлэбин көннөрү оробуочайынан, слесарынан саҕалаабытым. Сыах, тэрилтэ, оройуон, министиэристибэ, Бырабыыталыстыба салайааччытынан үлэлээбитим. Онон дьон-сэргэ кыһалҕатын, тэрилтэлэргэ, улууска, өрөспүүбүлүкэҕэ баар уустуктары өйдүүбүн уонна ону быһаарарга суоллары көрдүүбүн», – диэн саҕалаата өрөспүүбүлүкэ аҕа баһылыга. Егор Борисов өрөспүүбүлүкэ үгүс нэһилиэнньэлээх пуунугар Саха сирин сирэ-уота Индия, итиэннэ арҕааҥы Европа территориятын кытта тэҥнии тутуохха сөбүн, оннук киэҥ дойдуга үлэлээн-хамсаан олорорбутун бэлиэтээтэ. Кини өрөспүүбүлүкэ салалтата үс хайысханан үлэлиирин ыйда. Бастакынан, федеральнай киини кытта Саха сирин сайдыытын боппуруостарыгар сөптөөх кэпсэтиини ыытыыга, сыһыаны олохтооһуҥҥа, Россияҕа ылыллар бары сыаллаах федеральнай программалар өрөспүүбүлүкэҕэ олоххо киириилэригэр. Кэлиҥҥи кэмҥэ Саха сиригэр бу хайысхаҕа күүстээх үлэ барар, итиннэ көрүллүбүт үп уопсай суумата 30 млрд солкуобайга тэҥнэһэр. Бу элбэх харчы. Бастатан туран, болҕомто социальнай программалары уонна баараҕай бырайыактары олоххо киллэриигэ уонна өрөспүүбүлүкэ олохтоохторо тыйыс усулуобуйаҕа олороллоро, кэлиигэ-барыыга уустуктары көрсөллөрө учуоттанарыгар ууруллар. Бүтэһик түөрт сылга баараҕай бырайыактары аҥардас бырайыактааһыҥҥа федеральнай бюджеттан 6 млрд солкуобай көрүллүбүтэ, оттон инвестор-тэрилтэлэр 17 млрд солкуобайы куппуттара – элбэҕи этэр. Бүгүн үлэ бастакы түһүмэҕэ түмүктэннэ, билигин бырайыактары олоххо киллэрии, Саха сирин соҕуруу өттүгэр гидроэлектростанциялары тутуу, уран, тимир руда, газ промышленностарын тэрийии соруга турар. Өрөспүүбүлүкэ бюджетын дохуота тэрилтэлэрбит киллэрэр нолуоктарын уонна федеральнай өйөбүлү кытта бииргэ ааҕан, 2006 сылга тэҥнээтэххэ, икки төгүл улаатта. Егор Борисов маныаха кризис кэмигэр «АЛРОСА» АК РФ Бырабыыталыстыбата көмөлөһөн эрэ эстибэтэҕин тоһоҕолоон бэлиэтээтэ. Өрөспүүбүлүкэ аҕа баһылыга салалта үлэтин иккис хайысхатынан – бэйэни салайыныыны, олохтоох тэриллиилэри сайыннарыы буоларын ыйда. «Бүгүн манна сөптөөх нуормалыыр, быраабы биэрэр акылаат уурулунна, муниципалитеттар ыйааһыннаннылар, бэйэлэрэ болномуочуйалаахтар, экономика-үп өттүгэр эрэйдээхтик да буоллар кыһалҕаларын быһаараллар. Государство сорох болномуочуйалары эмиэ олохтоох тэриллиилэргэ биэрэн эрэр. Биллэн турар уустук элбэх. Үчүгэйэ диэн дьон-сэргэ бэйэтин сиригэр-уотугар салайыы боппуруостарыгар кыттыһыаҕа уонна миэстэтигэр олохтоох былаас тугу гынара дьэҥкэтик көстүөҕэ. Бу хайысхаҕа үлэ баран иһэр», – диэтэ президен. Егор Борисов өрөспүүбүлүкэ Президенин уонна Бырабыыталыстыбатын үлэтин үһүс, сүрүн хайысхатынан иһинээҕи, социальнай-экономическай политиканы ыытыы буоларын бэлиэтээтэ. Манна кини экономикаҕа үс сүүрээн баарын эттэ. Бастакыта, уруккуттан баар салаалары – «АЛРОСА» компания киирэр горнодобывающай промышленноһы, чоҕу хостооһуну, көмүһү хостуур промышленноһы уо.д.а. өйөөһүн. Иккиһэ, промышленнос саҥа салааларын – неби, гаһы хостооһуну, переработканы тэрийии. Үсүһэ, өрөспүүбүлүкэҕэ инвестордары тардар, аҕалар туһугар инфраструктураны – электрическэй уот ситимнэрин, тимир суолу, массыына суолларын уо.д.а. тутуу. Өрөспүүбүлүкэ баһылыга кэнники сэттэ сылга «АЛРОСАны» кэтээн көрөр сэбиэт бастакы солбуйааччыта буоларын быһыытынан компания үлэтин-хамнаһын үчүгэйдик билэрин, стратегическай боппуруостарыгар күннэтэ үлэлэһэрин эттэ. Егор Борисов Саха Өрөспүүбүлүкэтин Бырабыыталыстыбата – «АЛРОСА» сүрүн акционера, компанияны социальнай эппиэтинэстээх, Мирнэй оройуонун дьылҕатын быһаарар уонна Саха сирин экономикатыгар биир тутаах тэрилтэ быһыытынан көрөрүн, итинэн ситимнээн кэнники кэмҥэ элбэх боппуруос үөскүү сылдьыбытын тоһоҕолоон эттэ. «Билигин РФ Бырабыыталыстыбатын кытта кэпсэтин түмүгэр Саха Өрөспүүбүлүкэтэ 25% уонна өссө эбии 1% акцияны, онно эбии 8 % муниципальнай тэриллиилэр киэннэрин бэйэтигэр хаалларар. Маны таһынан РФ Бырабыыталыстыбата ылбыт 25 % уонна өссө эбии 1% акциятын бэйэтигэр тутан олорорун туруорсабыт. Оччотугар государство хонтуруола баар буолуоҕа. Маннык балаһыанньаны биһиги салгыы тутуһуохпут, көмүскүөхпүт», – диэн эрэннэрдэ Егор Борисов Мирнэй оройуонун олохтоохторугар. Саха Өрөспүүбүлүкэтин Президенэ киирбит ыйытыыларга толору эппиэттэри биэрдэ уонна уонча сыллааҕыта ыытыллар кэпсэтиилэртэн бүгүҥҥү адьас ураты – дьон туруорсар боппуруостарбыт быһаарыллыахтара диэн эрэллээхтэрэ өтө көстөр диэн үөрэрин биллэрдэ. «Мирнэй оройуона Саха сиригэр урут-уруккуттан биир кыахтааҕынан биллэр этэ уонна билиниллэр даҕаны. Ол гынан баран олох-дьаһах уонна экономика уустуктарын быһаарыыга манна өрөспүүбүлүкэ салалтатын болҕомтотун тардар боппуруостар эмиэ элбэхтэр. Онон бүгүҥҥү кэпсэтии миэхэ олус туһалаах буолла. Ол эрээри Мирнэй оройуонун сайдыытын боппуруостарын көрүүгэ өрөспүүбүлүкэ Президенин, Бырабыыталыстыбатын кыаҕын эрэ буолбакка, бэйэ күүһүн эмиэ учуоттуур сөптөөх буолуо», – диэн санаатын үллэһиннэ Егор Борисов. Түмүккэ президен Мирнэй олохтоохторугар аһаҕастык кэпсэппиттэрин уонна кинини өйдөөбүттэрин иһин махталын биллэрдэ, итиэннэ өрөспүүбүлүкэ Бырабыыталыстыбата уонна «АЛРОСА» компания оройуон олоҕор көхтөөхтүк кыттыахтара диэн мэктиэ тылын биэрдэ.
|